ئاریەن

کەجەکە: پێویستە٣ی ئاگووست وەکوو ڕۆژی كۆمەڵكوژی ژنان بناسرێت

هاوسەرۆكایەتی کۆما جڤاکێن کوردستان، كەجەكە لە ساڵیادی کۆمەڵکوژی گەلی ئێزدی ڕاگەیاندراوێکی بڵاو کردەوە، کەجەکە جەختی کردەوە دەبێت نەتەوە یەکگرتووەکان، یەکیەتی ئوروپا و هەموو دامەزراوە نێودەوڵەتیکان رۆژی سێی ئاگووست بە هۆی ئەو هێرشە نامرۆڤانەیە کرایە سەر ژنانی ئێزدی وەکوو رۆژی کۆمەڵکوژی ژنان بناسن.

لە سەرەتای راگەیندراوەکەی کەجەکەدا وێڕای دووبارە کردنی بەڵێن بۆ بەدیهێنانی ئاواتەکانی شەهیدانی کۆمەڵکوژی ئێزدیەکان بۆ ئێزەدخانێکی ئازاد و سەربەخۆ سەبارەت بە رۆڵی گەریلا هاتووە: لە کاتی کۆمەڵکوژیەکەدا دوازدە گەریلای هەپەگە كە لە ناوچەكە نزیك بوون دەستیان لە دۆخەكە وەردا و سەدان ئێزدیان لە كۆمەڵكوژی ڕزگار كرد، لەلایەکی تریش شەڕڤانانی یەپەگە و یەپەژە لە ماوەیەكی كورتدا لە ڕۆژئاواوە خۆیان گەیاندە ناوچەكە و پاڵپشتی بەرخۆدانی ئەو گروپە گەریلایەیان كرد و نەیانهێشت شەنگال بە تەواوەتی بكەوێتە دەستی داعش، گەریلا یەكێك لە هەرە گەورەترین قارەمانەتییەكانی مێژووی مرۆڤایەتی تۆمار کرد و هێزە سەربازی و سیاسییەكانی ناوچەكە و هەموو مرۆڤایەتییان لە شەرمی كۆمەڵكوژی ڕزگار كرد.

لە درێژەی راگەیندراوەکەی کەجەکەدا هاتووە:کۆمەلکوژی سێی ئابی ٢٠١٤ نیشانیدا كە پێویستە ئێزدیەکان خاوەن پێگەیەكی خۆبەڕیوبەری بن، جڤاكی ئێزدی لە شەنگال و هەر شوێنێك كە تێدا دەژین پێویستە لە چوارچێوەی ژیانێكی ئازاد و سەربەخۆ بتوانێت خۆی بەڕێوە ببات و بپارێزرێت. لە سەرویانەوە عێراق، نەتەوە یەكگرتووەكان و هێزە نێودەوڵەتییەكان پێویستە وابكەن كە ئێزدیخان ببێتە خاوەنی وەها خۆبەڕێوبەرییەك.پێویستە دەوڵەتی عێراق پێگەی ئازاد و سەربەخۆی ئێزدیخان بە یاسای بنەڕەتی مسۆگەر بكات، هەموو پارت و ڕێكخستنە كوردییەكان ئەو بەرپرسیارەتییەیان لە ئەستۆیە كە بۆ ئازادیی و خۆبەڕێوبەری ئێزدیخان كار بكەن.

کەجەکە لە درێژەی راگەیندراوەکەیدا جەخت دەکاتەوە بیرۆكەی “نەتەوەی دیموكراتیک” كە بە شێوەیەكی یەكسان لە باوەڕ، كلتور و ئەتنیكە جیاوازەكان دەڕوانێت، چارەسەری كێشەكانی ڕۆژهەڵاتی ناوەڕاستە. خۆبەڕێوبەری شەنگال بۆ عێراق و ڕۆژهەڵاتی ناوەڕاست دەبێتە مۆدیلێكی نمونەی نەتەوەی دیموكراتیک.
پێویستە نەتەوە یەكگرتووەكان، یەكێتی ئەوروپا و هەموو ڕێكخراوە نێودەوڵەتییەكانەوە هێرشی داعش لە سێی ئابی ٢٠١٤ بۆ سەر ئێزدیخان، وەكوو كۆمەڵكوژی بناسرێت، بە هۆی ئەو هێرشە نامرۆڤانەوە لەدژی ژنانی ئێزدی پێویستە سێی ئاب وەك ڕۆژی “كۆمەڵكوژكردنی ژنان” بناسرێت.

کەجەکە بەمجۆرە درێژە بە راگەیاندنەکانی خۆی دەدات ڕێبەر ئاپۆ لەمێژە بۆ ئەوەی ئێزدییەكان ببنە خاوەن ژیانێكی ئازاد و دیموكراتیک تێدەكۆشێت، لە ساڵی ٢٠٠٧ و دواتر لە ساڵی ٢٠١٤ داوایكرد ئێزدییەكان بپارێزرێن، بۆیە ماوەیەك پێش هێرشەكەی ٢٠١٤ گەریلا لە شوێنێكی نزیك شەنگال بەجێی بوون و كاتێك داعش هێرشی كرد ئەوانیش دەستوەردانی دۆخەكەیان كرد، بۆیە هەم بزوتنەوەی ئازادیخوازی و هەمیش مرۆڤایەتی قەرزداری ڕێبەر ئاپۆن، چونكە ئەگەر ڕێبەر ئاپۆ پێش هێرشەكە ئەو داوایەی نەكردبا و هۆشداریی نەدابا، ئەو كۆمەڵكوژییە ئەستەنگ نەدەكرا، پێویستە مرۆڤایەتی بەو ڕاستییە بزانێت.

لە کۆتایی راگەیندراوەکەی کەجەکەدا هاتووە: لە ساڵیادی فەرمانی ٧٤ەمدا بۆ بەدیهێنانی ئاواتی ژنانی ئێزدی و قوربانیانی ئەو کۆمەڵکوژیە، ئێمە بەڵێنمان بۆ تێكۆشان تا بەدیهاتنی كوردستانێکی ئازاد و ڕۆژهەڵاتی ناوەراستێکی دیموكراتیک لەسەر بنەمای بیری نەتەوەی دیموكراتیک دووبارە دەكەینەوە.