ئاریەن

ناڕەزایەتیەکانی عێراق بەردەوامە

ناڕەزایەتیەکانی ناوەڕاست و باشوری عیراق بەردەوامە و دەیان کوژراوی لێکەوتوەتەوە.

ئەمڕۆ لە چوارەم ڕۆژی خۆپێشاندانەکانی ئێراق ئاڵۆزی و پێکادان لە نێوان خۆپیشاندەران و هێزە ئەمنیەکاندا فروانتر بویەوە.

بەگوێرەی سەرچاوەکانی هەواڵ، بەهۆی تەقەی ‌هێزە ئەمنیەکانی ئەو وڵاتەوە زیاتر لە ٣٠ کەس کوژراون و هەزار و ٢٠٠ کەسیش بریندار بوون.
هەروەها بەهۆی خۆپێشاندانەكانەوە حكومەتی بەغدا هێڵەكانی ئینتەرنێت و بەشێک لە تەلەفۆنی لە زۆربەی شار و ناوچەکانی ئێراق پچڕاندووە و داوا لە هەرێمی کوردستانیش کردووە هەمان هەنگاو بگرێتەبەر.

ئومێد مەحەمەد ساڵح وتەبێژی وەزارەتی گواستنەوە و گەیاندنی حكومەتی هەرێمی كوردستان بەڕۆژنیوزی ڕاگەیاندوە: وەزارەتی گەیاندنی عێراق داوایان لێكردوون هاوشێوەی شارەكانی عێراق، لە هەرێمی كوردستانیش هێڵەكانی ئینتەرنێت و تۆڕە كۆمەڵایەتییەكان ڕابگیرێن.

خۆپیشاندەران داوا دەکەن حکومەت دەست لەکار بکێشێتەوە.

خۆپێشاندەرانی عێراقی، کە دژی نەبوونی خزمەتگوزاریی، خراپی دۆخی ئەمنی، بێکایری و خراپی باری ئابوریی سێ ڕۆژە لەسەر شەقامن، ئەمڕۆش دوای نوێژی هەینی لە بەغدای پایتەخت و شاری نەجەف ڕژانە سەر شەقامەکان و داوایان کرد، حکومەتی عەبدولمەهدی دەست لەکار بکشێتەوە.

درەنگانی شه‌وی ڕابردوو عادل عەبدولمەهدی، سه‌رۆك وه‌زیرانی عێراق لە ڕاگەیەندراوێکدا وەڵامی داواکاریی خۆپیشاندەرانی دایەوە.

سەرۆک وەزیران بە خۆپیشاندەرانی وت:”داواکاریی و نیگەرانییەکانتان ڕەوایە، ئێمە لە سەرەتاوە وتمان چاكسازی دارایی و سیاسی و كۆمەڵایەتیمان دەستپێكردووە، لەڕێگەی ئەو پرۆژانەی كە لەماوەیەكی كورتدا دەیدەینە ئەنجومەنی نوێنەران، بۆ ئەوەی موچە بدرێت بە هەموو کەمدەرامەتەکان و بتوانین داهاتێكی شیاو بۆ هەموو تاکێکی عێراقی دابین بكەین. بەڵام لەوە ئەچی خەڵکی ناڕازی شارەکانی عێراق بڕوا بە بەڵینەکانی سەروک وەزیرانی وەڵاتەکەیان نەکەن و پەرە بە ناڕەزایەتیەکانیان ئەدەن.

دوای روخانی رژیمی سەدام حوسەین بە زوری دەسەڵات لە دەست شیعەکانی عێراق دا بووە و ئەوەش دەستی رژیمی ئێرانی بۆ دەستوەردان لە کاروباری ناوخوی عێراقا واڵاتر کردوە و ئیستە بەشێک لە شیعەکان دژی ئەو دەستێوەردانانەی ڕژیمی ئێرانن.