ئاریەن

پەیامی گەلی باشور: خەونی ئەردۆغان بۆ داگیرکاریی نابێتە ڕاستی

لەدژی داگیرکاریەکانی دەوڵەتی تورکیا بۆسەر باشوری کوردستان ، لە شارو شارۆچکەکانی باشوری کوردستانەوە بەهەزاران هاوڵاتی بەڕێکەوتن بۆ قەندیل و ڕایانگەیاند کە خەونی ئەردۆغان و داگیرکاری نابێتە ڕاستی و ژمارەیەک چالاکوانی ئینتەرناسیۆنال بەشداری قەڵغانی زیندوی قەندیل بون.

ئەمڕۆ دوای گەیشتنی خەڵكی باشوری كوردستان بە قەندیل و دوای ئەنجامدانی نوێژی هەینی، ڕێپێوانیان ئەنجامدا و لێدوانیان بۆ ڕای گشتی دا.

تۆڵهەڵدان زیلان، وەك نوێنەری گەنجانی قەڵغانی زیندوو قسەی كرد و وتی: ئێمە دەزانین كە دەوڵەتی داگیركەری توركیا دەیەوێت خاكی باشوری كوردستان داگیر بكات، ئەو داگیركارییەش نەك تەنها لەسەر قەندیل، بەڵكو لەسەر هەموو باشوری كوردستانە، هەربۆیە دەبێت ئێمە خاوەنداریی لە خاكی كوردستان بكەین و ڕەخنەشی لەبێدەنگی حکومەتی هەرێم گرت لەبارەی ئەو هێرشانەوە.

دواتر مامۆستا پەروێز، نوێنەری دەستپێشخەریی دژی داگیركاریی دەوڵەتی توركیا وتی: هێزەكانی گەریلا،لەسەرجەم سنورەکانی باسوری کوردستان لەدژی چەتەکانی داعش وەستانەوە و نەیانهێشت خاکی باشوری کوردستان داگیربکرێت و ئێستا ئەردۆغان بەباینوی هەبونی گەریلا دەیەوێت باسوری کوردستان داگیربکات ، دەبێت هەمو گەلی کورد و پارتە سیاسیەکان ئەو ڕاستیە بزانن.

هەروەها مەلاسامان سەنگاوی لە وتەیەکدا بانگەوازی جیهانی ئیسلامی کرد و وتی ، قەندیل و باشوری كوردستان لەژێر مەترسی داگیركارییدان، دەبێت هەموو مامۆستایانی ئایینی بانگی پاراستنی خاكی كوردستان بكەن.
دواتر محەمەد حەسەن، هاوسەرۆکی بناری قەندیل بەخێرهاتنی هاوڵاتیانی باشوری کوردستانی کرد و ووتی ئێمە بەهیچ شێوەیەک بەرامبەر دەوڵەتی تورکیا سەری خۆمان کز ناکەین و خەونی ئەردۆغان بۆ داگیرکردنی قەندیل هیچ کاتێک نابێتە ڕاستی.

لەکۆتایی چالاکیەکەدا هاوڵاتیان سەردانی گۆڕستانی شەهید محەمەد قەرەسونگوریان کرد.

لەلایەکیتر، دوێنێ ، گروپێکی گەنجانی ئینتەر ناسیۆنالیست کەلەووڵاتی ئیتالیاوە ڕویان لە باشوری کوردستان کردبوو دەچنە بناری قەندیل و بەشداری چالاکی قەڵغانی زیندو دەبن و ئەم گروپەش لەدوای ئەو گروپە گەنجەی ووڵاتی فەرانسا دێت کە ڕۆژی ١٧ ئەم مانگە بەشداری چالاکی قەڵغانی زیندوی گەنجانی ووڵات پارێز بون لە قەندیل.