ئاریەن

ده‌میرتاش له‌ دادگه‌: به‌سه‌ربه‌رزی چوومه‌ زیندان و هه‌ر وه‌هاش لێی ده‌رده‌چم

هاوسه‌رۆكی گشتیی پێشووی هه‌ده‌په‌ له‌ دانیشتنی دادگه‌دا وتی: نه‌ چاوه‌ڕوانی دادپه‌روه‌ری له‌ دادگه‌ی ئێوه‌ ده‌كه‌م، نه‌ باوه‌ڕم به‌ دادپه‌روه‌ریی لای ئێوه‌ هه‌یه‌.

دانیشتنێكی دیكه‌ی دادگه‌یی كردنی سه‌ڵاحه‌دین ده‌میرتاش هاوسه‌رۆكی گشتیی پێشووی پارتیی دیموكراتیی گه‌لان – هه‌ده‌په‌ له‌ لایه‌ن نۆزده‌یه‌مین دادگه‌ی سزای توندی ئه‌نقه‌ره‌ به‌ڕێوه‌چوو.

دانیشتنی ئه‌م خوله‌ی دادگه‌یی كردنی ده‌میرتاش‌ كه‌ له‌ به‌ندیخانه‌ی سینجان به‌رێوه‌ده‌چێت له‌ ڕۆژی سێیه‌م دایه‌. سه‌ره‌ڕای ئاماده‌بوونی په‌رله‌مانتارانی هه‌ده‌په‌، یاریده‌ده‌ری سه‌رۆكی گشتیی پارتیی گه‌لی كۆماری – جه‌هه‌په‌ ته‌كین بینگۆل-یش له‌ دانیشتنه‌كه‌دا ئاماده‌بوو.

هاوشێوه‌ی دوو ڕۆژی ڕابردوو، ته‌نها ڕێگه‌ به‌ ٥٠ كه‌س درا به‌شداری بكه‌ن له‌ دانیشتنه‌كه‌. ده‌میرتاش ده‌رباره‌ی ئه‌و بابه‌تانه‌ قسه‌ی كرد كه‌ له‌ دۆسیه‌كه‌یدا پێی تۆمه‌تبار كراوه‌. چالاكییه‌كانی باكووری كوردستان و توركیا بۆ پشتگیریی كۆبانێ له‌ ٦-٨ی تشرینی یه‌كه‌می ٢٠١٥ و كوشتنی ٢ پۆلیسی سه‌رێكانی-ی هه‌ڵسه‌نگاند.

«داودئۆغلوو سیاسه‌تمه‌دارێكی بێ كه‌ڵكه‌»

ده‌میرتاش كاتێك باسی سه‌رۆكوه‌زیری پێشووی توركیا ئه‌حمه‌د داودئۆغلوو-ی كرد وتی: كتێبێكی خراپیش بنووسێت، ئه‌و ئه‌كادیمییه‌كی گرنگه‌، به‌ڵام وه‌ك سیاسه‌تمه‌دارێك ته‌واو شكستخواردووه‌.

ده‌میرتاش له‌ باره‌ی داودئۆغلوو ئاماژه‌ی بۆ ئه‌وه‌ كرد، بۆچی ده‌رباره‌ی ئه‌و ڕووداوانه‌ ئه‌وه‌نده‌ په‌له‌ی كرد و چاوه‌ڕوانی دادگه‌ی نه‌كرد؟ چۆن توانی له‌ ماوه‌ی كاتژمێرێكدا هه‌موو ڕووداوه‌كان ڕوون بكاته‌وه‌؟ ده‌بێ ئه‌وه‌ ئاشكرا بكات. ده‌ستنیشانیشی كرد كه‌ داودئۆغلوو هیچ كاتێك باوه‌ڕی به‌ پڕۆسه‌ی چاره‌سه‌ری نه‌كرد.

«داودئۆغلوو سیاسه‌تمه‌دارێكی بێ كه‌ڵكه‌ كه‌ ڕێكخستنی ده‌وڵه‌تی ئیمپریاڵی نوێ-عوسمانی خستبووه‌ مێشكی خۆی. به‌ چاوێكی یه‌كسان سه‌یری گه‌لی كوردی نه‌كرد. له‌ شه‌ڕی ده‌خوارد و بۆ كۆتاییهێنانی پڕۆسه‌ی ئاشتی هه‌وڵی ده‌دا.»

«هیوام به‌ دادپه‌روه‌ریی ئێوه‌ نییه‌»

سه‌ڵاحه‌دین ده‌میرتاش له‌ دانیشتنی دادگه‌ وتی: «كاری سیاسه‌تمه‌داران ئه‌وه‌یه‌ كه‌ ئه‌لته‌رناتیڤه‌كان بئافرێنێت. سیاسه‌تمه‌دارێك كه‌ نه‌توانێت ئه‌وه‌ بكات، خوێنمژێكی بێ كه‌ڵكی سیاسییه‌. سوپاس بۆ خودا كه‌ له‌م باره‌یه‌وه‌ ویژدانمان ئاسووده‌یه‌، ئێمه‌ هه‌تا كۆتایی هه‌وڵماندا. ئه‌گه‌ر بووبمه‌ هۆكار بۆ ڕزگاركردنی گیانی یه‌ك مرۆڤیش، ئاماده‌م هه‌زار ساڵ له‌ زیندانداندا بمێنمه‌وه‌. ئه‌گه‌ر ئێمه‌ ڕێگریمان له‌ ته‌شه‌نه‌كردنی شه‌ڕ كردبێت، ئه‌گه‌ر ئێمه ته‌نیا بۆ ڕۆژێكیش‌ ته‌مه‌نی پڕۆسه‌ی چاره‌سه‌ریمان درێژكردبێته‌وه‌ و كه‌سێكمان ڕزگار كردبێت، ئاماده‌م كه‌ قوربانی له‌پێناودا بده‌م و هه‌زار ساڵ له‌ زینداندا بمێنمه‌وه‌. ئه‌وانه‌ی له‌ كوشتنی هه‌زاران مرۆڤ به‌رپرسیارن و سه‌ره‌ڕای ئه‌مه‌ش به‌شێوه‌یه‌كی خۆشگوزه‌ران ده‌ژین، ده‌وڵه‌تیان به‌ده‌ستهێنا و به‌دوای خۆشی خۆیاندان، ئایا هێنده‌ی من دڵیان ئاسووده‌ و ئارامه‌ كه‌ له‌ قاوشی پیتی ئێف-دام؟ نا، ئارام نین. دڵی من زۆر ئاسووده‌یه‌. له‌ قاوشی پیتی ئێف-ی ئه‌دیرنه‌ به‌ ئاسووده‌یی ده‌حه‌وێمه‌وه‌ كه‌ له‌ جوانترین كۆشك باشتره‌. نه‌ چاوه‌ڕوانی دادپه‌روه‌ری له‌ دادگه‌ی ئێوه‌ ده‌كه‌م، نه‌ باوه‌ڕیشم به‌ به‌دیهێنانی دادپه‌روه‌ری هه‌یه‌ له‌ لای ئێوه‌.»

«فشار ده‌خرێته‌ سه‌ر دادوه‌ران»

ده‌میرتاش له‌ درێژه‌ی وته‌كانیدا ئاماژه‌ی بۆ ئه‌وه‌ كرد: من نه‌هاتوومه‌ ئێره‌ بۆ ئه‌وه‌ی له‌ به‌رانبه‌ر تۆمه‌تباركردنم به‌رگری له‌ خۆم بكه‌م، هاتووم كه‌ تاوانه‌كان بخه‌مه‌ڕوو.

«زه‌ختێكی وه‌ها زێده‌ له‌سه‌ر دادگه‌ ده‌كه‌ن كه‌ له‌ ئاستی گوتندا نییه‌. ئه‌گه‌ر ڕێی تێبچێت هه‌وڵ ده‌ده‌ن كه‌ ده‌میرتاش بخه‌نه‌ ده‌ره‌وه‌ی مه‌یدانی سیاسه‌ت. من ئاگادارم كه‌ بۆ ئه‌وه‌ی قه‌ده‌غه‌ی سیاسه‌ت به‌سه‌ر مندا بسه‌پێنن، له‌ سه‌رووی پارێزه‌رانه‌وه‌ زه‌خت له‌ دادوه‌ران ده‌كه‌ن. ئێمه‌ باوه‌ڕ به‌م دادگه‌یی كردنه‌ بكه‌ین؟ له‌وانه‌یه‌ سیاسه‌ت له‌ من قه‌ده‌غه‌ بكه‌ن، به‌ڵام به‌ مردوویش حاڵی من ده‌توانێت له‌ هه‌ندێك كه‌س زیاتر سیاسه‌ت بكات. كاتێك بڕیاری قه‌ده‌غه‌كردنی سیاسه‌ت به‌سه‌ر مندا ده‌سه‌پێنن، ئایا ناشنووسن كه‌ «بڕیار درا ئیدی گه‌ل خۆشیان نه‌وێت؟» هه‌تا مردنیش سیاسه‌ت له‌ من قه‌ده‌غه‌ بكه‌ن، هه‌ر سیاسه‌تمه‌دارم. ئه‌وانه‌ی هه‌ڵبژاردنی سه‌رۆك كۆماری توركیا ده‌ستنیشان ده‌كه‌ن ئێمه‌ین. كلیل ئێمه‌ین. قه‌ده‌غه‌ی سیاسه‌ت له‌سه‌ر من هه‌بێت یان نه‌بێت، ئێمه‌ هه‌ر ئێمه‌ین. كلیل له‌ ده‌ستی ئێمه‌دایه‌. با بزانین چی ده‌كه‌ن.»

«كورد سه‌ربه‌رزن، قبووڵی ناكه‌م پیتی «ك» به‌بچووكی بنووسرێت»

ده‌میرتاش قسه‌یه‌كی خۆی خوێنده‌وه‌ كه‌ بووبوو به‌ بابه‌تی تۆمه‌تباركردن و له‌ ڕه‌شنووسی دۆسیه‌كه‌یدا پیتی «ك»ی وشه‌ی «كورد» به‌بچووكی نووسرابوو، ناوبراو له‌و باره‌یه‌وه‌ وتی: «كورد وه‌ك هه‌موو گه‌لان كۆمه‌ڵگه‌یه‌كی به‌هادار و سه‌ربه‌رزه‌. به‌مه‌به‌ستی بچووككردنه‌وه‌، پیتی «ك» به‌بچووكی نووسراوه‌. نووسین به‌م شێوازه، بچووك كردنه‌وه‌یه‌. ده‌بێ ڕاست بكرێته‌وه‌، من ئه‌وه‌ قبووڵ ناكه‌م.»

هاوسه‌رۆكی گشتیی پێشووی هه‌ده‌په‌ وتیشی، ئه‌و به‌سه‌ربه‌رزی چووه‌ته‌ زیندانی ئه‌دیرنه‌ و هه‌ر وه‌هاش لێی ده‌رده‌چێت.