ئاریەن

کەنەکە: بە پیلانگێڕیش ئۆجالان وازی لە تێکۆشان نەهێنا

کۆنگرەی نەتەوەیی کوردستان، کەنەکە، لە میانەی راگەیاندراوێکدا بەبۆنەی نۆزدەهەمین ساڵوەگەری گەلەکۆمێی نێودەوڵەتی دژ بە رێبەری گەلی کورد، عەبدوڵا ئۆجالان، جەختی لەوە کردوەتەوە، دەسەڵاتداری جیهانی بە پیلانگێڕی ویستی پەکەکە لاواز بکات، بەڵام نە ئۆجالان وازی لە تێکۆشان هێنا، نە خەڵکی کورد و کوردستانیانیش دەستبەرداری دۆزی ڕەوای خۆیان بوون.

لەراگەیاندراوەکەی کۆنگرەی نەتەوەیی کوردستان، کەنەکە، بەبۆنەی نۆزدەهەمین ساڵوەگەری گەلەکۆمێ نێودەوڵەتی دژبە رێبەری گەلی کورد عەبدوڵا ئۆجالان هاتووە، رێککەوتنی نێوان تورکیا و هاوپەیمانە جیهانیەکانی، بۆ ڕفاندنی ئۆجالان، بە هیوای ئەوە بەڕێوەبرا کە پەکەکە وەک پێشەنگێکی رادیکاڵی بزووتنەوەی نەتەوەیی کوردستان، لەناو ببەن، بەڵام لەماوەی ئەم ١٨ ساڵەدا بە پێچەوانەوە نە ئۆجالان وازی لە تێکۆشان هێنا، نە خەڵکی کورد و کوردستانیانیش دەستبەرداری دۆزی ڕەوای خۆیان بوون، ئەو گەلەکۆمێیە لەهەمان ساڵی دەستپێک و سەرکەوتنی بزووتنەوەی کوردستان لە هەڵبژاردنی ئازاری ١٩٩٩ کە ژمارەیەکی زۆر شارەوانی کەوتە دەست کوردان، مایەپووچ دەرچوو.

 

کەنەکە ئاماژەی بەوەشکردووە، ئەوە ٢٥ ڕۆژە بە هاوکاریی لەگەڵ پاشماوەکانی داعش و ئەلقاعیدە، سوپای تورک بە هەموو هێزی خۆی پەلاماری عەفرین دەدات، لە بەرامبەریشدا شەڕڤانان و گەلانی باکووری سوریا بەوپەڕی قارەمانێتییەوە بەرگری دەکەن و وەڵامی تورکیا دەدەنەوە، گەلی کوردستان بە هەموو توانای خۆی عەفرین دەپارێزێت و یەکێتی ناوخۆی خۆی بەهێزتر دەکات، با دەوڵەتی تورکیا بزانێت کە چۆن گەلی کوردستان پێش ١٩ ساڵ بەرخۆدانی کرد، گەلەکۆمەی نێودەوڵەتیی مایەپووچ کرد، ئەمڕۆش لە بەرخۆداندایە، هەتا دوایی و تا ئەو هێرشانە تێکدەشکێنێ و وڵاتی خۆی ئازاد دەکا، هەر بەردەوام دەبێت”.

 

کەنەکە لە کۆتایی راگەیاندراوەکەیدا بە بۆنەی ساڵوەگەڕی گەلەکۆمەی ١٥ی شوبات، جارێکی تر داوا لە هەموو کوردستانیان دەکات، لە ناوخۆ و دەرەوەی وڵات، دەنگ و هاواری تێکۆشان بۆ ئازادی ئۆجالان و ڕزگاریی کوردستان بڵند بکەن، بە یەکێتی خۆیان نەیاران و هاوپەیمانانیان شەرمەزار بکەن.