ئاریەن

فەرمانداری گشتی یەپەگە: له‌ ١١ به‌ره‌ی شه‌ڕ به‌رخۆدان هه‌یه‌

سیپان حەمۆ، فەرمانداری گشتیی یەپەگە ڕایگەیاند: له‌ ١١ به‌ره‌ی شه‌ڕی عه‌فرین به‌رخۆدان هه‌یه‌. وتیشی: ڕووسیا بە چاوپۆشی كردن له‌ هێرشی تورکیا بۆ سەر عەفرین، هەڵەیەکی مێژوویی کرد.

 

سیپان حەمۆ وتی:ئەردۆغان لە هەوڵی زیندو کردنەوەی میراتی ئیمپراتوریەتی عوسمانی دایە و روسیا لە هێرشی بۆ سەر عەفرین بە کردنەوەی ئاسمانی سوریا بە رووی فڕۆکەکانی تورکیا هاوکاری ئەردۆغانی کرد.

 

وتیشی زیاتر لە ٣ هەفتەیە کە سوپای تورکیای داگیركه‌ر بە سوود وەرگرتن لە هێزی ئاسمانی و هەموو جۆرە چەکێکی قورس و تەنانەت قەدەغه‌کراویش، زۆر دڕندانە پەلاماری عەفرین دەدات.

 

جێگەی داخە کە کۆمەڵگەی نێودەوڵەتی هەتا ئێستاش لەسەر ئەو بابه‌ته‌ بێدەنگە. بێ هەڵوێستی و ڕێگە نەگرتنی هێزە نێودەوڵەتییەکان لەو شاڵاوە دڕندانەیەی سوپای تورکیا، بەمانای بەشداریکردنیان دێت لەو کۆمەڵکوژییە. یەپەگە هەر ئەو هێزەیە کە بە نوێنەرایەتی جیهان، داعشی لە پایته‌ختەکەی (رەقا)، تێکشكاند.

 

سیپان حەمۆ، فەرمانداری گشتی یەپەگە، ئاماژه‌ی بۆ ئه‌وه‌ كرد: سەرەڕای هێرشه‌كان، یەکینەکانی پاراستنی گەل بەردەوام دەبن لە پاراستنی قارەمانانەی خاک و گەلی عەفرین و وتی لە ئیستادا لە ١١قۆلەوە شەری سەخت لە ئارادیە.